ການປະຕິບັດທັມທັງພາຍໃນລາວເຮົາ ແລະປະເທດເພື່ອນບ້ານ ເຖິງວ່າຈະມີວິທີການປະຕິບັດແຕກຕ່າງກັນ ຂື້ນກັບແຕລະສຳນັກ ແຕ່ວ່າຈຸດມຸ່ງໝາຍແມ່ນຄືກັນ ຄືຕ້ອງການຫລຸດຈາກອາສາວະກິເລດ ບັນລຸພຣະນິບພານ. ຄວາມແຕກຕ່າງສິ່ງໜຶ່ງທີ່ເຫັນໄດ້ຊັດເຈນກໍຄືຄຳພາວະນາ ບາງສຳນັກກໍພາວະນາວ່າ “ພຸທໂທ” ຫັນໃຈເຂົ້າພຸດ- ຫັນໃຈອອກໂທ, “ພອງໜໍ ຍຸບໜໍ” ຫັນໃຈເຂົ້າທ້ອງພອງ ພອງໜໍ - ຫັນໃຈອອກທອງຍຸບ ຍຸບໜໍ, ນະມະພະທະ, ສັມມາອະຣະຫັງ ຫລືແມ່ນແຕ່ຕິດຕາມລົມຫາຍໃຈເຂົ້າ-ອອກຢູ່ທີ່ດັງ (ອານາປານະສະຕິ) ແລະອື່ນໆ.
ການປະຕິບັດທັມທັງສະມາຖະກັມມະຖານ ມີອາຣົມ 40 ຢ່າງ ມຸ່ງໝາຍໃຫ້ເກີດສະມາທິ ສ່ວນການປະຕິບັດວິປັສສະນາ ກັມມະຖານນັ້ນ ເປັນການຈະເຣີນສະຕິ ມຸ່ງໃຫ້ເກີດປັນຍາ ແຕ່ວ່າທັງສອງຢ່າງລ້ວນແຕ່ອາໄສເຊິ່ງກັນແລະກັນ. ບໍ່ວ່າທ່ານເຄີຍປະຕິບັດແນວໃດກໍຕາມຖືວ່າດີ ເປັນບຸນເປັນກຸສົນ ເພາະເປັນການເພີ່ມພູນຄວາມບໍຣິບູນຂອງສິນ ສະມາທິ ແລະ ປັນຍາ. ສະນັ້ນ ການປະຕິບັດຕົວຈິງທ່ານອາດຈະເຣີນສະມາຖະ ດ້ວຍການເລືອກພາວະນາໃນອາຣົມໃດໜຶ່ງ ເມື່ອເກີດສະມາທິດີ ແລ້ວຈິ່ງຕໍ່ວິປັສສະນາກໍໄດ້ ຫລື ທ່ານຈະເລີ່ມຕົ້ນວິປັສສະນາເລີຍກໍບໍ່ເປັນຫຍັງ. ການສຶກສາວິປັສສະນາກັມມະຖານໃນພາກປະຣິຍັດເຫັນວ່າສັບສົນແລະເຂົ້າໃຈຍາກ ແຕ່ວ່າໃນພາກປະຕິບັດແລ້ວ ວິປັສສະນາຈາຣຍຫລາຍທ່ານເຫັນວ່າບໍ່ຍາກ.
ແຕ່ເຖິງຢ່າງໃດກໍຕາມ ຂ້າພະເຈົ້າຂໍນຳສະເໜີວິທີການປະຕິບັດ ວິປັສສະນາກັມມະຖານຕາມແນວສະຕິປັດຖານ ເຊິ່ງເປັນວິທີການທີ່ໄດ້ຮັບຄວາມນິຍົມທີ່ສຸດໃນປະຈຸບັນ ໂດຍໄດ້ສຶກສາຄົ້ນຄວ້າຈາກຄູ່ມືປະຕິບັດວິປັສສະນາຂອງພຣະອາຈາຣຍ ພັທທັນຕະ ໂສພະນະມະຫາເຖຣະ ອັຄຄະມະຫາບັນດິຕ (Mahasi Sayadaw), ພຣະອາຈາຣຍ ມະຫາໂຊດົກ ຍານະສິທທິ, ແນວທາງປະຕິບັດຂອງພຣະອາຈາຣຍ ພັທທັນຕະ ອາສະພະມະຫາເຖຣະ ທັມມະຈາຣິຍາ ແລະ ພຣະວິປັສສະນາຈາຣຍທ່ານອື່ນໆ ຕາມສາຍ ພອງໜໍ ຍຸບໜໍ.
ການປະຕິບັດວິປັສສະນາກັມມະຖານເພື່ອໃຫ້ໄດ້ຜົນດີແລະຍັງມັກຜົນນິບພານນັ້ນ ຜູ້ປະຕິບັດໃໝ່ໆຈຳເປັນຕ້ອງມີວິປັສສະນາຈານເປັນຜູ້ໃຫ້ກັມມະຖານ ແລະຄອຍໃຫ້ຄຳແນະນຳຢູ່ຕະຫລອດໄລຍະເຂົ້າປະຕິບັດ ແຕ່ວ່າຖ້າຕ້ອງການຝຶກສະຕິໃຫ້ຮູ້ເທົ່າທັນກັບອາຣົມທີ່ເກີດຂື້ນໃນຊີວິດປະຈຳວັນທຳມະດາ ກໍສາມາດຄົ້ນຄວ້າແລະລອງຝຶກດ້ວຍເອງໄດ້ຕາມອັດທະຍາໄສ (ກາຍານຸປັສສະນາ, ເວທະນານຸປັສສະນາ, ຈິຕຕະນຸປັສສະນາ ແລະ ທັມມານຸປັສສະນາ ສະຕິປັດຖານ).
# ທ່ານສາມາດສຶກສາໃນລາຍລະອຽດເພີ່ມເຕີມຈາກ
1) ວິດີໂອວິທີການປະຕິບັດວິປັສສະນາ ເຊິ່ງຂ້າພະເຈົ້າໄດ້ເຊື່ອມລົງໃສ່ບລັອກນີ້ແລ້ວ
2) ເວບໄຊຂອງສູນວິປັສສະນາໄທ
3) ເວບໄຊຂອງວັດພັດທັນຕະອາສະພາຣາມ
4) ຄູ່ມືການປະຕິບັດວິປັສສະນາຂອງພຣະອາຈາຣຍ ມະຫາສີ ສະຍາດໍ
- Manual of Insight by Mahasi Sayadaw
- Satipatthana Vipassana by The Most Venerable Mahasi Sayadaw
- Practical Insight Meditation Exercises by The Most Venerable Mahasi Sayadaw
ປຣະມາຈາຣຍຕົ້ນຕຳດັບວິປັສສະນາສາຍ ພອງ ຍຸບ (Rising & Falling)
Cr. Saraniya.com
No comments:
Post a Comment