ໂດຍ: ພ. ໄຊຍະສຸກ
ຫົວ ສຳຄັນຄ່າລ້ຳ ເກີນກວ່າບັນຍາຍ
ເປັນຕາຍຂື້ນກັບຫົວ ບ່ອນບັນຊາຊີ້
ມີຫົວດີມາຄອຍຄໍ້າ ທຳອັນໃດມັນກໍງ່າຍ
ຫລາຍຫົວຫລາຍຄິດຄົ້ນ ປັນຫາແກ້ຊ່ວຍກັນ
ຫົວທົ່ວໄປຍັງຊ່ຳນີ້ ຫົວໜ້າຍິ່ງສຳຄັນ
ເພາະມັນຄືຕົວເດີນເກມ ສັ່ງລຸຍເດີນໜ້າ
ບັນຊາຫົວທາງຂ້າງ ທາງກາງໃຫ້ຕາມໄຕ່
ໄປເຖິງຈຸດທີ່ໝັ້ນ ຕາມເປົ້າຄາດໝາຍ
ຫົວໜ້າດີມີລູກນ້ອງ ແຫນແຫ່ເດີນຕາມ
ໄປທາງໃດມີຄົນຖາມ ຊື່ນຊົມຍໍຍ້ອງ
ຂອງວ່າເປັນຫົວໜ້າ ນຳພາວຽກທຸກຢ່າງ
ຍຸຕິທຳເປັນກາງບໍ່ເອນອຽງຫລອກໃຊ້ ເອົາໜ້າແຕ່ໂຕ
ລາງຄົນຕອນໜຸ່ມນ້ອຍ ເຮັດວຽກວິຊາການ
ອາດຫານເສຍສະຫລະ ເພື່ອສ່ວນລວມຈິງແທ້
ພໍແຕ່ເຂົາຍໍຂື້ນ ເປັນນາຍຜັດເປັນຕ່າງ
ປະວາງສາຄວາມດີ ຜີອຳນາດໃໝ່ເຂົ້າ ຈິດໃຈເຈົ້າກັບປ່ຽນໄປ
ຖ້າເປັນນາຍໃຫຍ່ແລ້ວ ທຳຕົວປ່ຽນແປງໄປ
ໄຮ້ນ້ຳໃຈແລະສິນທຳ ກອບໂກຍບັງລູກນ້ອງ
ເຂົາຊິຮ້ອງ ຫົວຫຍ້າ ແທນຄຳ ຫົວໜ້າໃຫຍ່
ມື້ໜຶ່ງກໍຕ້ອງໄປ ບໍ່ມີໃຜທ່ຽງໝັ້ນ ເຮັດດີໄວ້ແກ່ສ່ວນລວມ ດີບໍ? 
---------------------------------------
---------------------------------------
No comments:
Post a Comment